Полная версия
Денгиз тўлқинлари қирғоққа урилиб мавжланаётган гўзал ва сўлим табиат, ёмғирли ҳамда баҳаво манзил. Ушбу гўшада жойлашган қадимий ва гўзал Мандерлей қўрғони… Асар мутолаасига киришар экансиз, нафақат сўлим табиат васфига қалбингиз ошуфта бўлади, балки ана шу маъвонинг ҳузурбахш иқлимини, фараҳбахш ифорини ҳис қиласиз. Мазкур мафтункор манзилда кечадиган сирли воқеалар жараёни эса қисмдан қисмга ҳайрат ва қизиқишингизни орттира боради. Бу таърифимиз ҳиссиётлар ва туйғулар туғёнига сабаб бўлувчи «Ребекка» асари хусусида. «Ребекка» – Дафна дю Морьенинг 1938 йилда ёзилган романи. Психологик триллер жанридаги асарда ёш қиз бадавлат бева эркакка турмушга чиқади ва эри ҳамда оиласидагилар каби ўзини ҳам ўлган биринчи хотиннинг хотираси таъқиб қилишини билиб олади. Ҳамманинг хотирасида ниҳоятда самимий ва жуда гўзал аёл сифатида муҳрланган Ребекка аслида ким эди? У билан боғлиқ қандай сирлар бўлган? Уларнинг ошкор бўлиши асар қаҳрамонлари ҳаётига қандай таъсир кўрсатади? Демак, бу каби саволларнинг барчасига қизғин мутолаа жараёнида жавоб топасиз. Эслатиб ўтамиз: мазкур бестселлер асар кўп маротаба саҳна ва экранга мослаштирилган. Аммо билишингизни истардикки, ҳеч қайси саҳна ёки кино асари ушбу романда ифода этилган атмосферани тақдим эта олмайди! Инглиз тилидан Гулнора Раҳмон таржимаси
